VIOLETA REXHEPAGIQI

PAK FJALE SE KUSH ESHTE ADRIATIK BERDAKU

ALBANUR PRESS: Violeta si nisi e tërë kjo?

Violeta Rexhepagiqi: Isha në shkollën fillore “Faik Konica” e ca njerëz nga Radio Prishtina e atëhershme erdhën për ti “testuar” fëmijët. Vërejtën se jam e talentuar për muzikë dhe më ftuan për tu bërë soliste për fëmijë në Radio Prishtinë. Në atë kohë erdhën edhe ca njerëz të tjerë të cilët kërkonin spikerë për fëmijë për të njëjtën radio dhe pasi dëgjuan se si lexoj më ofruan bashkëpunim.

ALBANUR PRESS: Por ti asokohe e vijove edhe shkollën e muzikës?

Violeta Rexhepagiqi: Po ky angazhim në radio bëri që të angazhohem edhe në shkollën e ulët të muzikës në Prishtinë. Vërejta se për 'ti kënduar këngët për fëmijë duhet që t'i njohësh notat dhe pastaj këngët mësohen më shpejt dhe më lehtë por edhe nëse harrohen, duke i falënderuar notave kujtesa për atë melodi të rikthehet. U regjistrova edhe në shkollën e ulët të muzikës dhe ashtu filloi.

ALBANUR PRESS: Cili ishte rezultati?

Violeta Rexhepagiqi: Kam fituar shumë shpërblime në “Akordet e Kosovës” , isha edhe anëtare e korit për fëmijë, lexova shumë radio-drama për fëmijë, këndova më se 40 këngë për fëmijë të cilat i incizova në Radio Prishtinë dhe të cilat emitoheshin pothuaj përditë.

Me një fjalë u bëra fëmijë i famshëm.

ALBANUR PRESS: Po si fillove të këndosh për të rinj dhe të mirësh me gazetari?

Violeta Rexhepagiqi: Tregime të gjata janë këto. Të themi se fati e deshi ashtu por edhe unë i ndihmova me punën dhe ambiciozitetin tim. Kisha grupin “Vivien” e pastaj këndova edhe si soliste. Dy herë e përfaqësova Kosovën në këngën e Evrovizionit. Për ata që nuk e dinë - ishte kjo garë në nivelin Jugosllav ku çdo republikë apo krahinë i kishte nga 2 përfaqësues. Udhëtova shumë asokohe dhe isha e ftuar si në Zagreb në emisionin prestigjioz televiziv “Stereovizia” por edhe në Beograd në emisionin shumë të shikuar.

“Hiti i muajit ”. Në festivalin televiziv të JRT-së garoi edhe emisioni i im i cili ishte video-art prezantim ndër të parët kosovarë por edhe Jugosllav : “Çdo kohë e ka kryeveprën e vet ”, për të cilin e shkrova skenarin dhe e punova regjinë.

ALBANUR PRESS: Pastaj erdhën masat e dhunshme në RTP dhe t'i mbetee pa punë?

Violeta Rexhepagiqi: Po, mbeta pa punë, por meqë bashkëpunoja edhe me ca qendra të huaja jeta e ime ishte në rrezik të vazhdueshëm. Ato ditë gazetari i cili punonte për Sky news më telefonoi duke më pyetur se çka vërtetë po ndodhte këtu? Më pastaj më ftoi që të shkoj në Budapest për tu përgatitur që të shkoj në rajone lufte. Pranova dhe shkova. Që atëherë i përcolla të gjitha ngjarjet e mëdha në Ballkan por edhe më gjerë. Isha edhe në Bagdad gjatë luftës së Gjirit. Të tërë këtë e bëja që nëse “kris” në Kosovë të isha ajo e cila do të raportonte nga këtu. Për fat të keq para se krisi lufta në Kosovë më ndodhi një aksident komunikacioni prandaj 2 vite e gjysmë nuk mund të ecja flisja etj., sepse e kisha lënduar trurin. Kur përfundova ushtrimet fizioterapeutike por edhe 14 tretmanë të akupunkturës të cilat i bëra në Mitrovicë te dr. Shaip Mripa unë fillova të eci ngadalë dhe të flas etj. por lufta ishte aty dhe unë me nënën dhe babin tim vendosëm të mbetemi.

ALBANUR PRESS: Ti edhe në atë gjendje u mundove që të ndihmosh?

Violeta Rexhepagiqi: Një mik i im gazetar anglez (BBC) ishte në Maqedoni dhe ne një kamp u takua me Donat Kaçin. E pyeti për mua dhe kur kuptoi se jam në Prishtinë dhe se nuk dua të largohem askund e mori numrin tim të ri të telefonit dhe me të shkelë në Londër më thiri me telefon. I tregova se çka ndodhë dhe çka dëgjova prej njerëzve të tjerë. Ai të tërë bisedën tonë e incizoi dhe emetoi. Ishte kjo një klithje për ndihmë. Ai ishte këtu edhe gjatë zgjedhjeve të fundit në Kosovë, u takuam dhe 4 ditë punuam bashkë.

ALBANUR PRESS: Tani punon në RTK?

Violeta Rexhepagiqi: Po dhe jam e lumtur që përsëri po i shkeli ato shkallë për të cilat mendoja se më asnjëherë nuk do ti shkeli. Punoj me ish bashkëpunëtorët dhe me ca fytyra të reja.

ALBANUR PRESS: Po muzika?

Violeta Rexhepagiqi: Tani kompozoj për të tjerët dhe në të shumtën e rasteve pos muzikës vetë i shkruaj edhe tekstet. Këtë nuk e punoj si të tjerët “për fiti” por pa u bindur në kualitetin e këngëtarit, këngën nuk e shes.

ALBANUR PRESS: Diç për fund?

Violeta Rexhepagiqi: Po e citoj një tekst timin të këngës “ Porsi palaço” :

Thonë jeta vazhdon
Përplot buzëqeshje, përplot lot...,

NESE KENI NDONJE KOMENT MIQE TE NDERUAR JU MUND TE LENI KOMENTIN TUAJ NE FORUMIN TONE VENDLINDJA!