BETEJA IME

Beteja Ime

Thaçi : « Flini të qetë se unë mirrem me politikë ! »

«Vetëm duke kërkuar të pamundshmen njeriu njohu dhe realizoi të mundshmen.

Ndërsa ata që u kufizuan në atë çka u dukej e mundshme asnjëherë nuk bënë një hap para ».-M.Bakunin, La Liberté, Paris, 1965, f.33

Më16 korrik të këtij viti Kryetari i PDSH-së z. Thaçi, i shoqëruar nga Kryetari i PPD-së, z. Vejseli, patën takim me 81 administratorët që janë në pritje të punësimit për më shumë se dy vite.
Bashkimi Demokratik për Integrim, permes Sektorit për Informim reagoi duke akuzuar Qeverië aktuale se « ka dështuar në politikën e saj për përfaqësimin e drejtë dhe adekuat të shqipatrëve në institucionet e shtetit . Për të mbuluar dështimin e tyre në këtë sferë, ata mundohen nëpërmjet punësimeve që i ka realizuar qeveria në mandatin e kaluar, ku pjesë e saj ka qenë edhe BDI-ja, t`i përdorin si të arritura të këtij mandati. ».
Nuk dëshiroj të analizoj paradokset që karakterizojnë diskurset politike rreth meritave për « të realizuar » diçka që është domosdoshmëri në përputhje me Marrëveshjen e Ohrit. Edhe në rast të realizimit të plotë të marrëveshjes në fjalë asnjë koalicion qeveritar nuk mund t’a konsideroj si realizim të vetin. Përkundrazi, zhagitjet e realizimit të plotë të të gjitha të drejtave që dalin nga kjo Marrëveshje u fakturohet koalicioneve qeveritare, ndërsa pasojat bien mbi popullin.
Ajo që më bëri përshtypje nga takimi i lartëpërmendur qëndron në shpalosjen e ambicjeve absulutiste të z. Thaçi. Frazën e famshme të Luigjit të XIV se « Shteti jam Unë ! » zoti Thaçi e kamuflon me një « përmbajtje të re » që do të sintetizohej me shprehjen « Politika jam Unë ! ».
Duke ju drejtuar 81 administratorëve që janë në pritje të punësimit ai dërgoi mesazhin e vet popullit : « Politika moderne kërkon që qytetaret të merren me politikë vetëm ditën e zgjedhjeve kur votojnë, ndërkaq ditët e tjera duhet të merren me punët e veta, të përparojnë, të ecin përpara, të shkollohen… Popujt e civilizuar kështu punojnë, prandaj besoj se edhe ne duhet të përdorim të tilla praktika. » !!! Me një fjalë : Flini të qetë se unë mirrem me politikë !
Sikur zoti Thaçi të ishte politolog do t’i kisha shtruar si pyetje se ku ka hasur idenë që popujt e civilizuar mirren me politikë vetëm ditën e zgjedhjeve ?! Duke dijtur se ai është stomatolog po i them se teoria politike që përfaqëson ai i gjason teorisë së ndonjë stomatologu që do të këshillonte popullin që për dhëmbët e vet të përkujdeset vetëm ditën kur të shkojë t’i shkulë te dentisti. !
Forma e depolitizimit që predikon z.Thaçi nuk ka lidhje as me « politkë moderne » e as me « popuj të civilizuar ». Kjo ka të bëjë me një formë të njohur të manipulimit politik që aplikohet nga njerzit që ndodhen në pushtet. Vetëm atyre u intereson që populli të mos mirret me politikë. Forma e manipulimit që z.Thaçi dëshiron ta insatlojë si karakteristikë e »politikës moderne » dhe e « popujve të civilizuar » më rikujton një temë fundamentale të luftës politike :politizimi/depolitizimi.

Në politologji është e njohur se në çdo moment të luftës politike ka një luftë paraprake për të përcaktuar (definuar) se për çka është e arsyeshme të luftohet, se për çka e vlen barra qiranë të angazhohemi, se çka është e mundshme ( e çka s'është e mundshme ) të kërkohet sot, çka është e pranueshme ( e çka s'është e pranueshme ) për këtë apo atë forcë, e kështu me radhë.
Pikërisht monopoli për definime të tilla është në duart e atyre që kanë pozitë dominante në një raport të caktuar forcash.
Të gjitha mekanizmat që përdoren (nga dhuna e deri te mediumet e ndryshme) kanë për qëllim që të imponojnë definicionin e tyre të kërkesave si definicion legjitim, si definicion i arsyeshëm, si definicion i vetëm i mundshëm.
Një nga objektivat që shtrojnë në këtë drejtim synon që të shtypurve t'u imponohen jo vetëm definicionet e kërkesave por edhe kufijtë e kërkesave të tyre. Madje, zoti Thaçi shkon edhe më larg ! Ua përcakton momentin kur duhet të mirren me politikë ! Ndryshe ka rrezik që të mos konsiderohen as « politikanë modern » e as “popull i civilizuar”
Sa here të ballafaqohemi me tentativat e shitjes së absolutizmit dhe totalitarizmit si « politikë moderne » detyrohemi të rikujtojmë veprat e mendimtarëve që u dëshmuan si luftëtarë të paepur kundër tiranisë.
Në këtë rast, vepra e famshme e filozofit të mesjetës, Etienne de la Boétie « Discours sur la servitude volontaire » ( Ligjëratë mbi nënshtrimin vullnetar) do të parafrazohej kështu :
Për popujt e diskriminuar, siq është populli shqiptar në Maqedoni, gjithnjë e më tepër po bëhet e qartë se ambicjet diktatoriale janë si një shkëndi e vogël, që rritet e forcohet nëqoftëse e ushqejmë me « materialin e nevojshëm » dhe sa më shumë ta ushqejmë aq më i madh bëhet zjarri që djeg. Kjo ambicje për të djegur godet në rend të parë ata që i qëndrojnë më afër, por rrezikon të djeg të gjithë ata që e ushqejnë në një mënyrë a një tjetër.
Për të hequr qafe diktatorin nuk duhet të bëjmë asgje kundër tij. Mjaftonë të mos bëjmë asgjë për te. Të mos i japim mbështetjen tonë, të mos « mbajmë dru » për t’ia rritur forcën shkatërruese të zjarrit të tij. Me një fjalë, nëse nuk bëhemi argat të së keqes do të shifni se sa shpejtë do të shuhet zjarri i i diktatorëve dhe do të mbetet vetëm hiri i pasojave të tyre.
Z.Thaçi dhe të gjithë atyre që predikojnë depolitizimin e popullit u themi shkurt : pasojat e politikës suaj populli i përjeton çdo ditë mbi kurrizin e vet. Ju dëshironi të përjetësoheni në politike dhe të krijoni iluzionin se nuk është e mundshme të ndryshohen gjërat. Harroni se populli shqiptar në Maqedoni për 17 vjet tri herë ka ndërruar « elitat » udhëheqëse dhe se ky popull e di fare mirë se vetëm duke u angazhuar aktivisht në politikë mund t’i detyrojë « përfaqësuesit politik » të respektojnë angazhimet e premtuara gjatë fushatave zgjedhore. Dhe ajo që është më e rëndësishme : populli i politizuar i bën politikanët të mos flenë të qetë !

 
NESE DONI TE KOMENTONI POLITIKEN E INTEGRIMIT TE ALI AHMETIT, ATEHERE JU DUHET TE KLIKONI KETU....!