GAZETARET NEN PRESION TE POLITIKES

Hapësira për të ushtruar detyrën e gazetarit është duke u ngushtuar në vazhdimësi, kështu që gjithnjë e më tepër vështirësohet liria e fjalës në Maqedoni

Driton Dikena

Gazetarët në Maqedoni ende punojnë në kushte të rënda dhe nën presion të përditshëm nga institucionet shtetërore, partitë politike dhe subjekte e individë të tjerë.

Hapësira për të ushtruar detyrën e gazetarit është duke u ngushtuar në vazhdimësi, kështu që tani është rëndë që të kultivohet liria e fjalës në Maqedoni.
Këtë e tregon edhe raporti I fundit nga organizata “Reporter pa kufij” ku Maqedonia e zënë vendin e 45 së bashku me Serbinë dhe Malin e Zi. Kjo analizë është bërë gjatë një periudhe një vjeçare.

Drejtuesit e organizatave mediave kanë mendime të ndryshme rreth lirisë së medias në vend, mirëpo pajtohen me faktin se duhet edhe më shumë për të bërë në këtë drejtim.

Hajrie Azemi nga Shoqata e gazetarëve shqiptarë në Maqedoni (SHGSHM) potencon se në Maqedoni nuk mund të themi akoma se ka liri mediale, e në veçanti mediat në gjuhën shqipe, derisa pjesa më e madhe kontrollohen nga pushtetarët.

“ Mediat në shqip gjithmonë kanë qenë dhe janë të nënçmuara nga vetë shqiptarët, madje më së shumti nga politikanët shqiptarë të cilët nuk kanë bërë asgjë për mediat. Them pa fije turpi - ne, gazetarët shqiptarë, e kemi humbur misionin. Kjo pasi pushtetarët deri tani kanë bërë emërimet e zëvendësve ose kryeredaktorëve e redaktorëve në një medium shtetërorë, që thuhet se është servis për qytetarë. Nuk është në rregull kjo që bëhet detyrimi I një kryeredaktori televizioni të kaloj nga partia në parti për të mbajtur postin e tij “kryeredaktor”. Pas këtyre gjërave vinë ngatërresa dhe mos guximi I gazetarëve për të thënë fjalën e tyre të lirë” shprehet Azemi.

Për dallim nga gazetaria shqiptare në Maqedoni ajo maqedone frymon më lirshëm. Këtë e thotë Zane Trajkovska drejtor ekzekutiv nga Instituti Maqedonas të Mediave (IMM).

Sipas saj raporti i organizatës “Reporter pa kufij” nuk është vlerësim i dobët për lirinë e mediave në Maqedoni.

“Ne gjendemi përpara edhe Amerikës, Kroacisë si dhe disa shteteve të tjera. Nga 160 shtete të jesh në vendin e 45 kjo do të thotë se është punuar në respektimin e shprehjes së mendimit të lirë. Por prapë kjo nuk duhet ta në inkurajoj. Mbetet edhe shumë për të punuar” shprehet Trajkovska.

Ajo shton se në Maqedoni ka kapacitet gazetarësh që kanë trimërinë të shprehen lirshëm por nuk kanë se ku ta shprehin atë.

“Ekonomia e dobët, rrogat e vogla që po i marrin gazetarët, statusi i tyre i parregulluar si duhet me ligj i bën të varur gazetarët.

Në Maqedoni nuk ka medium të pavarur ekonomikisht. Sikur edhe këtu tek në të ekzistonte një Kodeks i cili do të rregullonte pavarësinë ekonomike do të ishte më ndryshe dhe më mirë” thotë Zane Trajkovska nga Instituti Maqedonas për Media