Avokatët e së keqes, spin-mjeshtrit dhe selameti

Nebi Murseli, gazetar e gazetes LAJM
 
Mallkimet e nënës së Fatmir Jakupit sikur i kanë zënë shqiptarët e Maqedonisë. Djali i saj ishte vrarë në ditën e zgjedhjeve. Pas tetë vjetësh, shpirti i këtij 20-vjeçari nga Kondova e Shkupit, është trazuar. Kjo vrasje është harruar në kujtesën kolektive të aktorëve në politikë, është shlyer në kumtesat e shumë njerëzve që shkaktuan vrasjen e tij.

Vrasja për votë ka ndodhur. Dhe nuk është kjo ndërsyrje ndërshqiptare dukuri e re. Dita që duhet të jetë kryerje e obligimit qytetar dhe kombëtar është shndërruar në ditë tmerri. Shqiptarët tashmë janë buzë vëllavrasjes.

Po paguajnë haraçin e partive politike, të cilat që 18 vjet të plota po e rrejnë dhe këtë pjesë më të butë të shqiptarëve, arritën ta bëjnë më të egër. Shqiptarët e Maqedonisë, dikur sinonim i së mirës dhe shembull i solidaritetin ndërshqiptar, tash janë bërë ferrë në sy ndër shqiptarët e Shqipërisë, Kosovës dhe gjetkë.

Ali Ahmetin nuk mund ta shpëtojnë as UÇK-ja e Kosovës, as ajo e Maqedonisë…, as ushtria e NATO-s, në qoftë se zgjedh dhunën për të ardhur në pushtet. Menduh Thaçin nuk mund ta shpëtojë as Janusz Bugajski, e as nëse ngjallet Winston Churchill, në qoftë se ka vendosur me satër të bëjë “kasaphane”. Këta dy do të dënohen herdo-kurdo, kur një ditë shqiptarët do të esullohen e të shohin se paskëshin qenë të mashtruar. Dhuna ndërshqiptare është ngjizur qëmoti dhe tani është koha e pjelljes. I kontribuuan edhe BDI-ja edhe PDSH-ja.

Politikanëve shqiptarë të Maqedonisë u ka kaluar miu rreth mustaqeve. Dhe, duke mos pasur çfarë të ofrojnë në fushatë, kanë zgjedhur dhunën, si metodë më të mirë për të marrë votat. E kështu në Evropë nuk shkohet! E thanë troç ambasadorët evropianë.

Në veprimet politike janë bërë aso defekte, saqë s’ka se si të riparohen. Federalizmi do të kishte zgjidhur, ndoshta, të gjitha kontestet me maqedonasit në Maqedoninë e kontestuar. Por veprimet e fundit janë alibi e fortë për maqedonasit, të cilët vazhdimisht janë qarë se shkaku i shqiptarëve ka stagnuar shteti. Diplomatët janë të zhgënjyer tejmase, dhe, madje, me të madhe flitet se partive maqedonase u kanë sugjeruar formim të qeverisë së ardhshme pa asnjë subjekt shqiptar apo me te gjitha.

Nëse do të bënin koalicion VMRO-DPMNE dhe LSDM-ja, atëherë shqiptarët do të mbeteshin me gishta në gojë. Do të ishin të ndëshkuar për papjekurinë politike.

I përfolur si politikan që më së miri di t’i deskriptojë gjërat, Arbën Xhaferi, në një tubim parazgjedhor të PDSH-së, tha se është rruga e rëndë deri në selamet. Rruga në selamet përmes kapaciteteve intelektuale të kësaj partie nuk i qet shqiptarët në selamet, sepse s’ka intelektualë, në plot kuptimin e fjalës, në këtë parti. Intelektualë nuk ka as BDI-ja. Te këto parti shqiptare më shumë vlen shqiptari muskuloz dhe që është i gatshëm t’ia shkrep partisë tjetër kallash, sesa ndonjë shqiptar që di diçka.

BDI-ja dhe Ali Ahmeti janë shndërruar në avokat të së keqes, duke luajtur rolin e viktimës. Edhe PDSH-ja nuk është edhe aq e pafajshme. Nuk i hyjnë në punë as spin-mjeshtrit.

Le të vazhdojnë kështu dhe një ditë nuk kanë çfarë të marrin më nga shqiptarët Ali Ahmeti dhe Menduh Thaçi. Më vota nuk do të ketë për ta, nëse vazhdojnë të jenë makth për shqiptarët. Nëse shkojnë në fshatra shqiptare me qerre të blinduara dhe me tullacë e kallasha, atëherë e dinë se janë fajtorë dhe frikohen. Kur të dalë i vetëm në pazar të Strugës për të blerë molla dhe për të kërkuar kalimthi votën, atëherë Ali Ahmeti mund të thotë se është lider i shqiptarëve. Kur Menduh Thaçi fikalli vetë vjen në Shkup dhe në Bit Pazar blen cigare dhe kërkon ta votojnë, atëherë mund të lavdërohet për prijës të shqiptarëve. Përndryshe, vargjeç prej të dyve!

Per koment te ketij artikulli te Nebi Murselit, Kliko Ketu!