Mospërmendja eksplicite e rekomandimit të shkëputjes së sovranitetit të Serbisë mbi Kosovë, len happësirë për t’u kuptuar si vazhdimësi e këtij sovraniteti. Për shkak se, aktualisht, përmes Rezolutës 1244 Serbia e ruan sovranitetin nominal mbi Kosovë. Procesi i negociatave ka qenë dhe është duke ndodhur në kuadër të ombrellës politike- legale të kësaj Rezolute. Këto propozime të Ahtisaarit janë propozime në kuadër të Rezolutës 1244, dhe si të tilla ato definojnë ‘autonominë e zgjeruar’ të Kosovës.

Neni 1.2 – Kosovën e definon si shumësi të komuniteteve. Shqiptarët dhe serbët konsiderohen komunitete anipse shqiptarët janë mbi 90% e serbët 6%. Pra, sipas pakos së Ahtisaarit, shqiptarët në Kosovë nuk janë as popull, e as komb.

Neni 1.3 – Njerëzit në Kosovë kjo pako i quan ‘banorë’ e jo qytetarë. Qytetari është burim e sovranitetit ndërsa ‘banor’ është status që mund ta fitojnë edhe refugjatët. Ne po trajtohemi si refugjatë në shtëpinë tonë!

Neni 1.6 – Gjuhë zyrtare në Kosovë është shqipja dhe serbishtja. Kjo është shumë më tepër sesa që kanë shqiptarët në Maqedoni e lëre më se shqiptarët në Luginën e Preshevës të cilët janë të shtypur dhe rëndë të diskriminuar. Neni 1.8 – Nuk lejojnë as kërkesën për bashkim me ndonjë shtet apo ndonjë pjesë të shtetit tjetër. Pra, kufizim drastik nga jashtë.

Neni 1.10 – Tregon se në Kosovë do të sundojë bashkësia ndërkombëtare, e jo populli e qeveria e sa. Po ashtu, në këtë nen parashihet që Kosova t’i bëjë ftesë bashkësisë ndërkombetarë për këtë! Neni 2.1 – Nuk përmendet fare Konventa për të drejtat ekonomike, sociale dhe kulturore.

Neni 4 – Kur flitet për kthimin e refugjatëve dhe të zhvendosurve nuk merret parasysh fare kolonizimi serb përgjatë shekullit XX. Pakoja na e fshin historinë!

Neni 6.2 – I trajton në mënyrë të privilegjuar komunitetet joshumicë.

Neni 7 – Te trashëgimia kulturore dhe fetare konkretisht flitet vetëm për Kishën Ortodokse Serbe.

Neni 7.2 – Kisha Ortodokse quhet Kisha Ortodokse Serbe. Për më tepër personelit dhe klerikëve iu ofrohen privilegje dhe imunitet! Imunitet mund të kenë vetëm figurat politike. Jo ato fetare!

Neni 7.3 – Trason rrugën për ndërtimin e korridoreve që do të ndërlidhnin objektet fetare mes vete.

Neni 8 – Kosova quhet vetëm Kosovë e Serbia quhet Republika e Serbisë. Neni 8.1 – Politika fiskale dhe buxheti do të jenë nën mbikëqyrje të FMN-së dhe PCN-së.

Neni 8.2 – Flet për borxhin që do t’i alokohet Kosovës, e nenin 8 asnjë fjalë për dëmet dhe humbjet që Serbia i ka shkaktuar Kosovës gjatë luftës dhe para saj.

Neni 8.5 – Obligon Kosovën që të adresojë çështjet për kompensim të pronës. Cilës pronë? Kujt t’ia kompensojë?

Neni 9.6 – Parasheh shpërbërjen e TMK-së pasi që ajo na i paska përmbushur objektivat!

Neni 10.4 – Parasheh përdorimin e menjëhershëm të mekanizmit të shumicës së dyfishtë. Në mënyrë që kushtetuta të votohet në Kuvend, obligohen konsultimet e duhura me komunitetet joshumicë (serbët), që nënkupton se ata duhet ta pranojnë kushtetutën. Si do ta quajë Kosovën kushtetuta? Nëse shtet të pavarur, atëherë u dashka të pajtohen edhe serbët? Ata nuk do të pajtohen. UNMIK-u ka toleruar instrumentalizimin e tyre prej Beogradit.

Neni 13.4 – Vë në pah se sërish duhet t’iu dëshmohemi ndërkombetarëve për të marrë përgjegjësi në fushën e sigurisë. Ky është racizëm! Liria nuk është çështje meritokratike. Liria të takon pa kushte.