Blero, tërhiqet nga Festivali në RTSH

Blero, tërhiqet nga Festivali në RTSH
“Më kërkuan një shumë të madhe parash për vendin e parë”

Nga Ilda Lumani

Ndërsa Festivali i Këngës në RTVSH po merr startin, Blero lajmëron se nuk do të jetë më pjesë e tij. “Do të mungoj”, - ka thënë këngëtari, i cili vetëm pak ditë më pare erdhi në Tiranë i ftuar në një nga pubet e kryeqytetit, ku ai këndoi për gjithë natën duke argëtuar pa masë fansat e tij. Shumica e tyre patën mundësinë ta takonin nga afër këngëtarin e tyre të preferuar apo edhe të merrnin ndonjë autograf prej tij. Por ndërkohë ishte edhe një arsye më tepër vizita e tij në Tiranë. Pjesëmarrja e tij në Festivalin e Këngës në Radiotelevizion. Të cilës duket se i ishte dedikuar plotësisht këtë fund viti. E ndërsa pritej që ai të konkurronte, Blero është tërhequr. “Dhe pse jam në listën e konkurrentëve, kam vendosur të tërheq pjesëmarrjen time… Arsyeja është shumë e thjeshtë; edhe kësaj radhe nuk mungon korrupsioni dhe padrejtësia në këtë festival… Unë isha në Tiranë për rreth një javë, duke u ushtruar dhe përgatitur për “Festivalin e Madh”, kur një person anonim më tregoi me fakte se gjithçka është vendosur para kohe dhe vendi i parë, i dytë dhe i tretë, janë të vendosura nga vetë udhëheqja e festivalit. Për këtë arsye vendosa që të heq dorë nga ky festival”.

TËRHEQJA

Kështu është shprehur në një nga faqet e Internetit këngëtari, i cili vetëm pak ditë më parë fliste me mjaft entuziazëm për këngën e tij. “Është një këngë me ritëm, një këngë shumë interesante, një këngë festivali, një këngë që është përfolur dhe nga mediat e shteteve skandinave për pjesëmarrjen time në këtë festival. Është një këngë e kompozuar nga unë. Teksti nga Sokol Marsi dhe nga disa ndihmës kompozitorë që janë shumë të mirë në Suedi”, - tregonte Blero ishte mjaft optimist pak ditë më parë për këngën e tij. Ndërsa tashmë gjithë ky optimizëm është kthyer në një protestë nga këngëtari,që ka refuzuar skenën e Pallatit të Kongreseve, pasi ka zbuluar korruptimin, që po bëhet me këtë Festival. “Mendoj se është e padrejtë dhe e pamoralshme që gjëra të tilla ndodhin. Bëhen pagesa të fshehura për të fituar dhe këngët e gabuara e përfaqësojnë Shqipërinë në “Eurosong”. Siç jemi vërtetuar viteve të fundit, që Shqipëria nuk arrin as në finale të “Eurosong”, arsyeja është kjo pra”, - është shprehur këngëtari kosovar.

FALJE FANSAVE

Megjithatë, ai është me këmbë në tokë. “Nuk them që jam ndoshta këngëtari që duhet ta përfaqësojë Shqipërinë në “Eurosong”, por se të paktën le të vendosë populli përmes votave se kush do t’i përfaqësojë, e jo një juri e cila caktohet prej disa personave. Nuk dua t’I cek me emra, por po e them që më kërkuan një shumë të madhe parash për vendin e parë, dhe unë mendoj që është gabim të paguhet vendi i parë. Vendi i pare duhet të meritohet dhe të përkrahet nga populli dhe vota e tyre, e jo nga një juri…”. I vetmi detyrim që ndjen Blero është ndaj fansave të tij, të cilëve u kërkon falje. “Unë kërkoj shumë falje tek simpatizuesit e mi, për mungesën time në këtë festival, por me shpresë se do të më kuptojnë dhe respektojnë vendimin tim”, - e mbyll Blero argumentin që jep për mos pjesëmarrje në Festival. Blero këtë vit do të përfaqësohej me një këngë të kompozuar nga vetë ai. Në fakt këngëtari kosovar, i cili është i njohur me mjaft hite të tij në Shqipëri, konkurronte për herë të parë në Festivalin në RTSH. Dhe madje deri në momentet para tërheqjes ishte mjaft entuziast për pjesëmarrjen e tij, pasi ishte dhe një nga këngëtarët më të klikuar në faqet e Internetit, si një ndër kandidatët fitues për çmimin e parë të Festivalit. Por të gjitha këto ëndrra u shkërmoqën mjaft shpejt për këngëtarin.

BLERO DHE LEONORA POLOSKA

Ndërkohë, pas bashkëpunimeve të tij muzikore me këngëtarë si Shpat Kasapin e Te-Kamadën, një tjetër duet pritet të dalë së shpejti, ku këngëtarin do tashohim përkrah një këngëtareje po aq të njohur. “Bëhet fjalë për një bashkëpunim me një këngëtare nga Maqedonia shumë të mirë, siç është Leonora Poloska. Ndërkohë, së shpejti do të realizojmë edhe klipin e kësaj kënge, me titull “Kreizi”. Kënga është shkruar nga Leonora Poloska, ndërsa kompozimin e kam bërë vetë”, - tregon këngëtari. Këngë pritet të lançohet para Vitit të Ri, nëse planet e tyre do të shkojnë ashtu siç i kanë parashikuar. Në fakt, bashkëpunimet e tij kanë qenë mjaft të pëlqyera si nga publiku shqiptar ashtu edhe ai kosovar, e më tej në diasporë. E duke qenë se edhe Leonora Poloska është një këngëtare tanimë e afirmuar dhe e pëlqyer nga shumë njerëz, jemi të bindur se edhe me këtë bashkëpunim Blero do të godasë në shenjë. Megjithatë, siç rrëfen këngëtari, maksimumi i lançimit të këngës “Kreizi” do të jetë në fillim të vitit 2008.

VITI I RI PËR BLERON

Për shumicën dërrmuese të këngëtarëve, Vit i Ri do të thotë punë, koncerte, turne. E Blero nuk mund të dale kundër kësaj rrjedhe. Qysh prej dy muajsh ai e ka parashikuar axhendën e tij të Vitit të Ri. E pikërisht Blero do të jetë në Zvicër për natën e Krishtlindjeve, në Gjenevë për datën 31 dhe në datën 1 për Bajram, do të jetë në Kosovë. E në përfundim të 2007-ës për Bleron duket se ky vit ka rezultuar jo pak I suksesshëm. Me një album ne treg, (me titullin “Blero”), me pjesëmarrje të suksesshme në festivale, me mjaft koncerte e turne në mjaft vende.

Ky artikull eshte derguar nga Ivellau i Bleros