PROMOVIMI I ALBUMIT "HYMNI I DASHURISE" NGA EDONA LLALLOSHI

Prishtinë, 22 qershor – Këngëtarja Edona Llalloshi, të enjten në mbrëmje, ka promovuar albumin e saj më të ri, “Himn i dashurisë”.

E shoqëruar nga një numër i madh personalitetesh politike e kulturore, në mesin e të cilëve edhe ish – komandanti i brigadës “131”, “Jusuf Gërvalla”, tash politikan, Daut Haradinaj, Edona është ndier e privilegjuar që në promovimin e saj të këtë kaq shumë figura publike. Prezentë në promovim ishin edhe ministri i Kulturës, Astrit Haraqija, pastaj kryetari i Komunës së Prishtinës, Ismet Beqiri etj. Të gjithë këto personalitete kanë pasur kënaqësinë që të fitojnë nga një album falas me nënshkrim të Edona Llaloshit, në fund të promovimit.

Promovimin e ka udhëhequr Labinot Gashi – Labi nga Televizioni 21 (TV 21), i cili në emër të Edonës i ka falënderuar të gjithë ata që punuan në realizimin e këtij albumi.

 
Kompozitori i këngëve, Xhevdet Gashi, ka thënë se ndihet shumë mirë kur punon me Edonën. “Ndihem me të vërtetë shumë mirë, sidomos kur në punë nuk na përzihet Rrahmani (babai i Edonës)”, ka thënë me shaka Gashi.

Ndërkaq, Arsim Bunjaku, tekstshkruesi i këngëve, ka thënë se nuk ka hasur në probleme në shkrimin e teksteve të këngëve për Edonën. “Zakonisht, kompozitori Gashi, orkestrimet e këngëve m’i ka sjell një apo dy javë përpara. Kjo më ka ndihmuar shumë, që tekstet t’i përfundoj me kohë”. Fajtor për titullin e këtij albumit - “Himn i dashurisë”, Edona e ka lënë poeten dhe shkrimtaren Naime Beqiraj. Poetja Beqiraj tha se vetë Edona simbolizon një person që reflekton dashuri të pakufishme.

Ndërkaq, këngëtarja Llalloshi, pasi ka falënderuar edhe njëherë të gjithë të pranishmit, ka thënë se në të ardhmen do të punojë edhe më shumë që adhuruesit e vet të jenë sa më të kënaqur me punën e saj. Ajo në fund ka interpretuar “live” 12 këngët e albumit të saj, të cilat i ka përmbledhur në një kolazh të vetëm.